Atag Momoguno 'Momogun'

Nunu komozon do 'momogun'?

Songian poingizon songuhun do id iso kinoizonon toi kampung, komozon do momogun toi ko momoomogun o tuhun dii do id kinoizonon toi kampung dii. Om doiho nogi ii boos 'pogun'. Sokukuang do duvo komozon do 'pogun'. Iso' nopo nga oguno miaga do 'Pogun Sabah'. Ii nopo koduvo nga pinosungkadan haid do hamin tu minundahiu do hamin ii sanganu.

Tuhun nopo ii poingizon do id iso kinoizonon toi pogun nga mamasok o tuhun dii do doiho. Pungaanan o tuhun dii do tuhun mamasok. Kivaa moboos do "pasok" o tuhun dii. Nga kivaa komozon suvai do boos 'pasok', iso mantad di baagizan do hamin.

Di kavavagu, nimaan paatago do gunoon ngaan "momogun" do pomungaan do tuhun ii mamasok sandad Pogun Sabah. Gunoon iti, ka, do pogohon do 'lain-lain' id foom kopolintaan. Kivaa nogi tuddu do suvai dati nokuo tu maan gunoo boos 'momogun'.

Mantad nodi dii do kivaa piuvahan id piahatan do huguan ngaavi do tuhun mamasok sandad pogun (indigenous people). Miaga kozo do mimang babak o pisaan dioho.

Nimaan uoto ii Huguan Siou Tan Sri Pairin Kitingan kokomoi ahal diti. "Momiubat nopo do timpu," ka disido. Nung Sino-Kadazan ko, ka vagu disido, maan nopo kinsilo ii 'lain-lain' om maan no posuato Sino-Kadazan. Iti no tiuvan disido.

Tou nung mokinongou o huguan ngaavi do tuhun mamasok sandad pogun diti.

Ko-29tv ko-7, 2016:
Huguan do Koisaan Koubasanan Rungus, Jornah Mozihim minoboos do, "... Tan Sri Joseph Pairin Kitingan no longer has any vision for his people" songian minongomi boos di Tan Sri Pairin kokomoi do momiubat noopo timpu do miboos mogium ngaan pomungaan do KDM.

Poguhu diti, kivaa komi-komi mantad piipio huguan tuhun mamasok kokomoi do momoguno "Momogun" pomungaan do tuhun Kadazan-Dusun om Murut.

Mokigiot di Huguan Siou do "Momogun" no ii koontok. Nunu dati aantakan nung okunan di Tan Sri Pairin Kitingan iti?

Koiho tokou dii do baino do au kaakun ii Huguan Siou do atag dii.

Kada Sindab, Kada Kaus
Kivaa di mongunsub do kada no daa do huguan tuhun mamasok do osikap mimang sindab toi kumaus. Nung ingkaa, aiso kodimpoton nga id pibabakan do tinimungan. Om songian do ababak, doiho no ii gagut ngaavi dioho do oondos tu au di tagal do tumangkangau kozo zioho kokomoi do havan dioho.

Kotumbazaai no, ka dioho, do au ii tumingkod ii gagut ngaavi do mamabak do tuhun mamasok gisom adadi zioho do aiso lompu. Dadi iisai di pahasaon? Naavi nga' sondii! sabap au koindad do kaakun saviavi kokomoi do ahal di agazo komozon doid tuhun ngaavi dioho.

Tabazai No
Tabazai no do mogium piokunan (consensus) songovian. Nung momoguno timpu di ana-u', tabazai no mooi do aiso di atagak, aiso di ohiivan, aiso di atahiban, aiso di kakaus, aiso di azadaan.

Olugi songuhun, olugi songovian. Komungkang songuhun, komungkang tinimungan. Dadi, soovo' no nunu aantakan songian komungkang o tinimungan.