Kakaal do kivaa vatu tagazo diti ii poinsungkad id danau pongumaan do paai do baino. Nokuo tuh kivaa diti? Isai pinapatanom diti?
Kivaa duvo susuzan kokomoi do vatu tagazo diti ii okito do miaga ko' mongumohig do kinoizonon pinosungkadan dii.
Tumanud do iso buuk ii nabasa ku di poguhu, novit mantad daat o vatu diti, ka. Nimaan tonggungai do napadan kusai tabagkong o vatu diti. Nokosuat do hobi kuang do 50 tuhun kusai, ka dati dii.
Nga koiho tokou do vatu nopo do id daat nga kaang. Au ohumis ii. Oomuk ii. Kivaa vatu ii agazo om ohumis nga okudi kozo ii, au ogumu.
Tumanud do boos do piipio tuhun tongotuutuo di poguhu, nimaan buntuttoh toi saano do songuhun no ii vatu. Okonko mantad daat nga mantad vasai id dampa do nuhu. Kivaa nogi pinopoiho dogo dii pipio vuhan nakatahib do ingkaa no susuzan ii noihaan disido. Zi'aki disido sondii o songuhun mantad tuhun tavakas diti.
Ingkuo dii do kaanu mogovit songuhun no do songinan vatu tagazo ii kivinagat do piipio ton? Di poguhu okonko ohumis o lahan pamanaan, okonko aantai. Nombo kivaa kulita pagangkat? Ingkuo kaanu kalabau mamagazat nung au' aantai?
Kivaa do sisimba diti. Kivaa dati id tatangah do ginumuan tuhun do au' otumbazaan do nunu oboos. Tuhun nopo di poguhu nga agazo om avakas, ka. Nga songkuo po vinakas do tuhun, au kaanu isido magangkat do vatu tagazo miampai momoguno do vinakas tinan sondii. Kivaa monokodung disido, ka. Nunu ma iti?
Kivaa do gimat do gunoon, ka. Gimat no diti o mamadadi do tuhun dii do avakas om bongkulitan. Nunu ma o gimat? Aanu iti mantad tuhun di bongkulitan nogi, ka. Mantad nombo kinoonuan disido diti? Tumanud do kapamalatian, mantad logon kinoonuan disido do vinakas diti. (Ingkaa no motuu di poguhu tu' aiso po kotumbazaan doun Kristian.)
Nung ingkaa iti, mositi nopo do oovit do tuhun diti o vatu tagazo do manaan toi momuntut. Om vatu diti no ii okito poinsungkad id danau do baino.
Pungaanan do "megalith" iti id boos Onggilis ii kilati do "a large stone that forms a prehistoric monument..." toi vatu tagazo ii dinadi do tanda ontok timpu di guhu ih kozo (poguhu timpu do kivaa susuzan id koponuatan).
Kakaal kivaa vatu diti pointanom id pomutanaman paai doiho Kodundungan id Penampang. Kavasa mooi intong om mongiho songkuo ih ginazo do vatu diti.
No comments:
Post a Comment